1Th 3 | GAH | STEP | Lekelikumú miluma geleaká nouke, minoko aleko umó netamigo, nezagó Atena numutoka mininake,

1 Thessalonians 3

1 Lekelikumú miluma geleaká nouke, minoko aleko umó netamigo, nezagó Atena numutoka mininake, 2 Timotini amiselekugo, ahulonimioko lekelitoka vitive loko lo hukumó. Eza nene ligiveteho noike Ómasímini hozaló ve minake, Kilistoni gakó lamaná loaká noi vémo monokú lekelémo vávani itive loko, itó ale kii loleketative loko, 3 itó lekelisi nene gopoguni mililikimikiko monó ahulikatave loko nene amiselekuve. Gopoguni mililimiaká niamó nenémo Ómasímo litó utó oaká noive liki lekeza mota gilinave. 4 Leza nene lekelitoka minunike goí oko lova nene lumupiló itinogo ive loko lo lekemenouháma neve. Ámina gakó nene alévolé okave liki mota gilinave. 5 Lá okago, ámina gasovagi netakumú nene gimilegú moloaká vémo gimilikú molahe, itó monó ahulahe, itó ali minahe, itó lelí hozámini gihiláa haha okahe, monó alinamó nenémini mogonáa gilitove loko lekelikumú miluma napa gelekuke minoko aleko umó netamigo, Timotini amiselekugo vimóma neve.

6 Itó Timotí nene lekelitokatí atiginá oko ake, gakó avetó oake lekeza gili alévolé amó itó likigika kimiake nasahilí ikimiaká niamó itó lekeza nene nenikumú lagaváa giliaká niamó itó neza lekelí ánigatove loko geleaká noumómámini iki není ánigatune liki giliaká niamó nenémini gakola lo leme asú okave. 7 Nenemú nigivénegita, gopogu galatakalatá nenémini agikagú itó miluma geleaká nenémini agikagú nouke, lekeza Izesukumú gili alévolé iaká niamó nenémini gakó gelekuke mulúnegú geha zekave. 8 Itína lekeza nene Guivahaniloka viki gímiziiki alévolé initakumú gelekinake, ligikagú lamaná okiko, minoko aleko inogo une. 9 Itína Ómasímini avogisaló lekelikumú mulutegú agila guluma noimómave loko lekelikumú Ómasi agepoka loaká noune. 10 Guivahanímo gele lemekiko, lekelitoka vinake, eza ánigiko eza ánigiko inake, monó lugáa minoloko vonoimó nene miní ameko lo likimitune loko únaká neteká vauva aleko Ómasiloka loaká noune.

11 Ameteho Ómasi ezáa itó Guivahanite Izesú gapo velelimikiko lekelitoka vituninazo. 12 Itó lekelitoka vokuko nene, Guivahanímo hoza alekiko, eza agika amiko eza agika amiko ita netalímo hutilí ino, itó ligika lekelitoka mulunimó áminámini iki likigika mukí vegenatoka milatamó nenémo puu loko hutilí oko napa ino. 13 Lá okiko, Guivahanímo likigika nene ale kii lolikimikiko, Guivahanite Izesú eza vegenala zuha mukí kelémoko ati zupa nene lekeza nene Ómasi ametehini avogisaló vihelé lo miniko etó keké viziki lihimatini nomiko minatave. ^{▼▼1 Apo 17:15
,} ^{▼▼6 Apo 18:5}